Bilbo Ibaizabal(e)an

Bertsolaria(k): Oihana Bartra
Doinua: Aita-semeak tabernan daude I

Euskal Herriko hiri handiena dugu Bilbo, Bizkaiko hiriburua. Ezagutu dezagun! Ibaizabal ibaiari segituz egingo dugu ibilbidea. Bertako bertsolaria den Oihana Bartrak emango dizkigu azalpenak!

PDF

ERREPIKA
Boluetatik Elorrietara
txaluparen magalean
goazen Bilbo ezagutzera
gure ibai zabalean.

Abusu pasa eta San Anton
zubia gogoz agurtu
baxuak lasai egon jarrita
eta altuak makurtu.

Erriberako merkatua ta
Arriagarantz ibaia
egin garrasi ea balkoira
irteten den Mari Jaia.

Udaletxea ta Zubizuri
Guggenheim zaigu hurbiltzen
titaniozko itsasontzi hau
ez da errekan kabitzen.

Deustura heldu ta nahi badugu
bidean luzaro iraun
*Tomateroen indarrarekin
egin behar dugu arraun.

(*)Deustuko arraun taldeari Tomatera esaten zaio.

Espaziontzi forman Athletic
zale guztien San Mames
hemen etxeko dira Reala
Osasuna ta Alaves.

Olabeaga eta Zorrotza
baino ez dira gelditzen
kondairak ez al zuen esaten
Bilbo ez dela amaitzen?