Bertsozale.eus | Bertsoa.eus | BDB Bertsozale Elkartea
Bertso Ikasgela logoa

Sexismoa nabarmena da oso publizitatean. Emakumeentzat etxerako garbigarriak eta perfumeak iragartzen dira gehien. Emakumeekin lotuz etxea, garbitasuna eta gizonentzat erakargarri egotea. Gizonentzat autoak dira produktu iragarrienak: mugikortasuna, abiadura eta luxuaren ikur.

Bertso sorta Sexismoa publizitatean

  • Bertsolaria(k): Ane Labaka Mayoz
  • Doinua: Zelaia ikusi dut
Iragarkiek emakumeei eta gizonei egozten dizkieten rolak.
1.
Maiz prentsa idatzian
maiz irratietan,
telebistan, Youtube-n,
bus geltokietan…
Mezu zehatzak doaz
letra txikietan
gezurrak saltzen dira
iragarkietan.

2.
Batzuk ausartzat hartuz,
besteak lerdentzat,
denak ez gara lagun
bolantearentzat.
Volskwagen-ak, Audi-ak
nahiz Mercedes Benz-ak…
Ez al dago autorik
emakumeentzat?

3.
Cillit Bang, Finish Quantum,
erratza, fregona…
Sukalde garbietan
hain janari ona.
Gure etxean ez da
betetzen kanona
gure aita delako
“etxeko-gizona”.

4.
Hezurrak ia bistan
dituen momia
biluztasunak biltzen
du anatomia.
Galdera bat sortzen zait
-ez da ironia
zer dago salgai neska
edo kolonia?

5.
Alde handia dago
nigandik Barbie-ra…
Photoshop-a zuzenduz
gerri, ipurdira,
mundu errealera
jartzean begira;
emakume lodiak
existitzen dira.