Sexismoa publizitatean

Maiz prentsa idatzian
maiz irratietan,
telebistan, Youtube-n,
bus geltokietan…
Mezu zehatzak doaz
letra txikietan
gezurrak saltzen dira
iragarkietan.

Batzuk ausartzat hartuz,
besteak lerdentzat,
denak ez gara lagun
bolantearentzat.
Volskwagen-ak, Audi-ak
nahiz Mercedes Benz-ak…
Ez al dago autorik
emakumeentzat?

Cillit Bang, Finish Quantum,
erratza, fregona…
Sukalde garbietan
hain janari ona.
Gure etxean ez da
betetzen kanona
gure aita delako
“etxeko-gizona”.

Hezurrak ia bistan
dituen momia
biluztasunak biltzen
du anatomia.
Galdera bat sortzen zait
-ez da ironia
zer dago salgai neska
edo kolonia?

Alde handia dago
nigandik Barbie-ra…
Photoshop-a zuzenduz
gerri, ipurdira,
mundu errealera
jartzean begira;
emakume lodiak
existitzen dira.