Omendu nahian etorri gira

Bertsolaria(k): Ixiar Eizagirre
Doinua: Omendu nahian etorri gara

Herriko pertsonaiak zirikatzeko kopla sorta.

Omendu nahian etorri gira
gure herriko okina
batzutan ogi errea dauka
eta bestetan gordina. (bis)

Omendu nahian etorri gira
gure herriko auzapeza
ingurukoak lanean jartzen
ere ez da lan erreza. (bis)

Omendu nahian etorri gira
herriko irakaslea
berak ahoa zabaltzen badu
sartzen zaigu logalea. (bis)

Omendu nahian etorri gira
gure herriko jostuna
galtza beltzetan hari zuria
sarritan jarri diguna. (bis)

Omendu nahian etorri gira
gure herriko apeza
gu xuxentzeko asmotan bada
alperrik da bere meza. (bis)

Omendu nahian etorri gira
gure herriko artzaina
bere ardiak besteen pentzetan
sartzea maite du baina. (bis)

Omendu nahian etorri gira
gure herriko medikua
bere ipurdian proba dezala
txertoaren zimikua. (bis)

Omendu nahian etorri gira
herriko ostalaria
ardoa ozpin bihurtzeraino
egiten du miraria. (bis)