|
Bertsoeskola
2022-02-25
Gauez ohera sartu, mantapera gozo-gozo,
eta norbaitek alboan ipuinak kontatzea.
-Kontatu beste bat... eta -beste bat...
ahotsarekin lokartu arte.
Plazer handiagorik!
Sar gaitezen ipuinen mundura.
Sei bertsorekin narrazio bat osatzen ariko gara.
Azken puntua eta oinak hartuta, atzekoz aurrera teknikarekin jardungo dugu bertsotan.
Txotxongiloekin, pantailan irudiz lagunduta edo
mozorroturik antzeztuz…
Gure ipuinak oholtzaratzeko prest?
Aukera anitzak ditugu bideotekan, ipuinekin gozatzeko: ahozko ipuin kontaketak, bertso ipuinak, "11 kantatzeko" proiekturako sortutako bertso ipuinak, ikasleek jendaurrean antzeztutako bertso ipuinak, ipuin klasikoen bertsio ganberroak eta mezu berritzaileak.
Ipuin bakoitzaren mezuak emango digu zertaz hitz egina ere...
Ezagutzen al ditugu Mari, Tartalo, Akerbeltz, Galtzagorriak, Laminak edo Basajaun?
Pertsonaia mitologiko hauen berri entzungo dugu lehenik eta, ondoren, bakoitza bertso batekin aurkeztuko dugu, puntu erdika 8ko txikiak osatuz.
Asmakizunetan jolastuko dugu. Ipuin baten berri emango dugu, kopla bakarrean; horretarako, oin bikotea emango zaigu.
Gure kopla entzunda, ea lagunek asmatzen duten zein ipuin den!
*Gelan dinamika hau egiteko karta jokoak erabili genitzake.
Ipuinetako pertsonaia ezagunei tiraka ariko gara oraingoan. Oin bikoteak emango dizkigute eta guk koplak sortuko ditugu. Kopla xelebreak, bitxiak sor genitzake... Nahi duguna egin genezake-eta pertsonaia horiekin!
Lau kondaira euskaldun ditugu aukeran: "Tartalo", "Patxi Errementaria", "Barbantxo" eta "Sasi guztien gainetik".
Lehenik, ipuin bakoitza entzungo dugu. Ondoren, guk hautatzen dugun narrazioa 6 bertsotan osatzeko, azken puntuak eta oinak emango zaizkigu.
*Gelan dinamika hau egiteko karta jolasak ere erabili genitzake.
Presta ditzagun bertso ipuinak!
Eta gero, kantuan nori kontatuko dizkiogu? Jendaurrean nola eman ere pentsa genezake: txotxongiloekin, antzeztuz, pantailan irudiz lagunduta...
Ezagunak egingo zaizkigu, ziur, beste 3 ipuin klasiko hauek ere. Kontatuko al ditugu seina bertsotan?
Horretarako, azken puntua eta oinak emango zaizkigu.
Hauta dezagun gustuko ipuina eta ekin!
