Larunbatean jokatu zen Nafarroako Txapelketa finala, Nafarroa Arenan 2.500 ikusle elkartuta. Saio ederra eskaini zuten 8 bertsolariek eta Illarregi anaiak iritsi ziren buruz burukora. Xabatek eskuratu zuen txapela, Joanes anaia 6,5 puntura zuela. Goza dezagun finaleko bertsoekin!
ZORTZI BERTSOLARI FINALISTAK
Saio ederra osatu zuten 8 bertsolari finalisten artean.
Ikusi al genituen kantuan, bertara joanda edo ETB1 katean zein www.bertsoa.eus atarian?
- Julio Soto (Iruñea, 1987). Nafarroako txapelduna izana da 6 aldiz.
- Saioa Alkaiza (Iruñea, 1991). Nafarroako txapelduna izana da.
- Joanes Illarregi (Leitza, 1999). Euskal Herriko Txapelketa Nagusiko finalean kantatu zuen, Nafarroa Arenan bertan. Larunbatean buruz buru aritu zen anaiarekin eta txapeletik gertu egon zen oso: 6,5 puntura baino ez.
- Eneko Lazkoz (Etxarri Aranatz, 1983). Nafarroako Txapelketan 4 aldiz izan da txapeldunorde.
- Xabat Illarregi (Leitza, 2001). Laugarren finala zuen Nafarroako Txapelketan eta bera dugu Nafarroako txapeldun berria.
- Sarai Robles (Barañain, 1996). Bigarren finala izan du Nafarroako Txapelketan.
- Ekhiñe Zapiain (Bera, 2002). Lehen aldiz aritu da Nafarroako Txapelketako finalean.
- Eki Mateorena (Leitza, 2005). Lehen aldiz aritu da Nafarroako Txapelketako finalean.
Liburutegira sartu da Julio, etxean zuen liburu bat itzultzera. Eki liburuzaina orain jabetu da, 10 urteko atzerapenaz ekarri duela liburua Juliok...
Enekok irakaslea izan nahi du eta horretarako azterketa pasa beharra zuen, oposaketa.
Zorte ona emateko, Xabat dendariari santu txiki bat erosi zion.
Baina ez du azterketa gainditu eta Eneko oraintxe sartu da Xabaten dendan, dirua itzultzeko eskatzera.
Gimnasiora joaten dira Joanes eta Sarai. Sarai jabetu da, Joanesek beti pesa handiagoak hartzen dituela berak baino; baina pisua altxa ezinik ibiltzen da gero...
Finaleko bertso saio ederraren azken zatian, buruz buruko lehiara zein bi bertsolari pasako ziren esan zuen aurkezleak: eta bi anaiak sailkatu ziren azken fasera! Joanes eta Xabat.
Ikus ditzagun puntutan. Hauxe zuten gaia:
Joanes San Saturnino da, eta hain juxtu larunbatean zen bere eguna. Xabat, berriz, San Fermin da eta jeloskor dago, Nafarroako Bertsolari Txapelketaren finala San Saturnino egunean jarri dutelako, eta ez San Ferminetan.
Xabat Illarregik Nafarroako txapela nori eskaini ote zion? Ikus dezagun!
|
Bertsoeskola
