2019-05-20
Arabako gazteek taldeka (3-8 lagun) aurkeztu ahal izan dituzte euren ekoizpenak lehiaketara. Bakoitzak nahi zuen gaia hartuta, bertsoak musikatuz, abestiei letrak aldatuz edo RAP moldeetan osatu zitzaketen bideoklipak.
III. edizio honetan 7 klip jaso dira, eta guztiak proiektatu dira maiatzaren 11an Legution ospatu den Bertsoa Bizi Gazte egunean. Lau sari nagusi banatu dira: bideo klip onenaren saria, originalena, web guneko bozkatuena eta txalo metroaren saria.
Bideoklip emanaldiaren ostean, Arabako Eskolarteko finalari ekin zitzaion.
Oholtzan 6 bertsolari gazte: Danel Herrarte, Aitor Ugarte eta Martin Abarrategi (Aramaioko bertso-eskolatik), Aroa Arrizubieta eta Eli Zaldua (Gasteizko bertso-eskolatik), eta Beñat Cano (Lautadako bertso-eskolatik).
Aroa Arrizubieta gasteiztarrak eskuratu zuen lehen postua, eta Aitor Ugarte aramaioarra izan da bigarren. Biek abestuko dute, beraz, ekainaren 8an Saran ospatuko den EH-ko finalean.
Festa arratsaldera arte luzatu zen Legution. Herri bazkariaren ostean dantzarako aukera jarri zuen Mulixka taldeak, eta oraindik mingaina bixi zuten bertso-eskoletako kideentzat mikrofono irekia zabaldu zen.
Bertsoa Bizi Gazte lehiaketako talde sarituek eta Arabako Eskolartekoan finalista izan diren bertsolariek, sari nagusiaz elkarrekin gozatu ahal izango dute: irailaren 6tik 8ra Eulaten (Nafarroan) egingo den egonaldia izango baita sari ederra. Gazteek, taldean, kirol abenturaz eta sormenaz goza dezaten, Urbasa natur parkean.
Puntua: Edertasuna nola duzu baloratzen?
Gaia: Klasean izan duzuen eztabaida batek etorkizunean pentsatzen jarri zaitu.