Geure burua ikusi ezinda

Bertsolaria(k): Xabier Terreros Gartzia "Terre"
Doinua: Igo aurretik lasai

Bere ikaskideen ezaugarri onak ikusteko gai da Auritz, baina bere buruarenak ez ditu ikusten. Izaera ezberdinak, nortasuna lantzeko sorta.

PDF

Hamaika urte ditut
Iruñeko AURITZ
badut familia bat
adiskide aunitz.
Ikastolan, auzoan
pozik nabil hagitz
dena dudala, esan
eta esan dabiltz
sinistuko nieke
gezurra ez balitz...

Ederra da AMETSEN
irrifar zabala
begirada gardena
hizketa apala
liluratzeko duen
berezko ahala...
Ederra litzateke
gelatik noala
niri begiratzea
berari bezala...

CARLA da futbolean
gelako onena
taldearen arima
taldean lehena
lagunei gol pasea
ematen diena...
Nik ere noizbait txute
regate, txilena...
egin nahi nuke berak
egiten duena!

LUR algarak zabaltzen
dituen sorgina
istorio ta txiste
kontalari fina
gure txokolatea
gure pipermina...
Tarteka izan nahi dut
bufoi kaskarina
baina ez daukat bere
grazia berdina...

MOHAMEDEK Einsteinen
jakinduri bera
denari buruz daki
gutxi gorabehera;
berdin du zein den gaia
ta zein den galdera
matematika, natur
gazte, ingelera...
Nik aldiz inoiz ez dut
hamarrik atera.

Ikastolan aurten dut
azkeneko maila
institutuan dator
hurrengo bataila...
Naizena onartzea
denez abantaila
nigan sinetsiz hartu
nahi nuke abaila
ziur ez dela uste
dudan bezain zaila!